शिंतोडा

चादर नाही, छप्पर डोक्यावर नाही
या रस्त्यांवर स्वप्नांचा वावर नाही
काल नफ्याने भिजले जे; या तोट्याचा -
शिंतोडाही त्यांच्या अंगावर नाही?
मंदी, युद्ध... तुम्हाला विषय चघळण्याचे
पोट तुम्हा लोकांचे हातावर नाही
रोजच पाणी देतो रोपांना, आता -
फार भरवसा या आभाळावर नाही!
सत्य हरवले छाया-पडछायांमध्ये
सूर्य कुणाचाही का माथ्यावर नाही?
खेळ सुरू ठेवा अवकाशप्रयोगांचे
माझी भाकर मंगळ-चंद्रावर नाही
कसली खोगिरभरती करता हो देवा
घट्ट कुणाची मांडच जगण्यावर नाही
फार अपेक्षा करणे मी सोडून दिले...
राग मलाही आता माझ्यावर नाही!

* मायबोलीच्या कार्यशाळा-२ http://www.maayboli.com/node/4183  लिहिलेली गझल