लागला गळपफास तेव्हा तरतरी श्वासात आली!

गझल
लागला गळपफास तेव्हा तरतरी श्वासात आली!
पार मेली भूक तेव्हा भाकरी हातात आली!!

पोटपाण्याचा निघाला मामला अन् वाकलो मी;
ताठ केली मान तेव्हा नोकरी धोक्यात आली!

वाटल्या लाटा दयाळू, अन् किनाराही कृपाळू;
लागला पत्ता न केव्हा जिंदगी गोत्यात आली!

कोण जाणे हे कधीचे नाचते तारुण्य माझे?
समजण्या आधीच काही पैंजणे पायात आली!

स्वप्न बघण्याचा मलाही लागला इतका लळा की;
ती जरी साक्षात आली, वाटते स्वप्नात आली!

काय मी सांगू कशाने गोडवा गझलेत आला?
वेदनांनी दंश केला, माधुरी शब्दात आली!

-------प्रा.सतीश देवपूरकर
भूशास्त्र व खानिज तेल तंत्रद्न्यान विभाग,
नौरोसजी वाडिया महाविद्यालय, पुणे.
फोन नंबर: ९८२२७८४९६१