ठेवणीतल्या आठवणींना....

.............................................................
ठेवणीतल्या आठवणींना....
.............................................................

गतकाळाच्या कपाटातले जुनेर जगणे दमट, दमट !
ठेवणीतल्या आठवणींना आता येतो वास कुबट !

अश्रूसुद्धा पूर्वीइतके राहिलेत हे तरल कुठे ?
कधीकाळच्या दुःखाचाही झाला आहे रंग फिकट !

त्यांच्या सलगीवरी एवढे उगाच मरणा जळू नये...
या श्वासांचे देहासंगे जन्मभरी असणार लगट !

कधीपासुनी एका ओळीवरीच रेंगाळली कथा...
पहाटवाऱया, ये, ये लवकर, हे रात्रीचे पान उलट !

कसलेला असशील एक तर किंवा अगदी कच्चाही...
किती निरागस भासतोस तू दाखवताना तुझे कपट !

भेटतेस तू रोज परंतू, भेटतेस तू रोज कुठे ?
एकदाच ये कधीतरी मज भेटाया तू तुझ्यासकट !

नाव तुझे मी घेत ईश्वरा घुमत राहिलो सतत जरी...
काय मला देईल देउनी आकाशाचा रिता घुमट ?

- प्रदीप कुलकर्णी