...पुढे मी गेलो !

...पुढे मी गेलो !

हे रान जरी घनदाट...पुढे मी गेलो ! 
काढून स्वतःची वाट...पुढे मी गेलो !

पायात जरी दररोज निराळी बेडी...
सोडून मला मोकाट..पुढे मी गेलो !

चौफेर पहारे, गस्त नि नाकेबंदी....
त्यातूनच बिनबोभाट पुढे मी गेलो !

फिरणार  तसा नव्हतोच कधी माघारी...
होऊन पुरी घबराट...पुढे मी गेलो !

आता न तुझ्या हातात मला थांबवणे
तू लाव कितीही नाट...पुढे मी गेलो !!

मंजूर मला नव्हतेच किनारा होणे... 
होऊन तुफानी लाट...पुढे मी गेलो !

कल्लोळ नको, आकांत नको मज माझा...
सोडून इथे गोंगाट...पुढे मी गेलो !

क्षण चार विसावा गार मिळाला नाही...
नव्हताच नदीला घाट...पुढे मी गेलो !

आरास खुणावत होती मज काट्यांची 
टाळून फुलांचा थाट...पुढे मी गेलो !

वगळून मला केलीस तुझी तू यादी...
मारून तुझ्यावर काट...पुढे मी गेलो !!

- प्रदीप कुलकर्णी