हाक

कविवर्य सुरेश भट यांचा आज (14 मार्च) स्मृतिदिन.
त्यांना विनम्र श्रद्धांजली.
...........................................................
हाक
...........................................................

दालनात दालने नि दालनात दालने
एक देह...त्यात ही मनातली किती मने !

बासरी तुझी घुमे चहूकडे अजूनही...
राहिलीत ही तुझी इथे चुकून स्पंदने !

मोकळेपणातही जरा न मोकळेपणा...
घातली कुणावरी जरी कुणी न बंधने

ये निदान तू तरी...समीप ये, समीप ये...
तू कशास राहतेस दूर दूर वंचने ?

मी विचारले नभास, ` जायचे पुढे कुठे ? -
- संपले समुद्र सात...सात संपली वने...`

थांबवायचे कसे मनातले विचार हे....?
एकसारखीच ही सुसाटतात वाहने

मी चुकूनही कधीच ओ न द्यायचो, तरी -
हाक मारलीस का मला चुकून वेदने ?

- प्रदीप कुलकर्णी