जाग आली

आटुनी गेले जिव्हाळे,जाग आली
कातडीवर आळ आले,जाग आली ।

वास्तवाशी तह नव्याने काल केला
आणि पुन्हा युद्ध झाले,जाग आली ।

का नव्याने शोधिली कृष्णात भक्ती
का मिरेचे विष प्याले,जाग आली ।

वाटले मज तू कुणी नाही निराळा
पण तुझे सारे निराळे! जाग आली ।

भावनेच्या मखमली गुंगीत जाता
स्वप्न कासावीस झाले,जाग आली ।

आठवानी खरवडे जखमा पुराण्या
तरुण सारे घाव झाले,जाग आली ।

मी तुला माझ्यातुनी 'चल जा!'म्हणाले,
आणि माझे प्रेत झाले! जाग आली ।