पडसाद

सूर त्याचे, चित्त माझे,  साद अन पडसाद आहे
तोकडा व्यासंग माझा;  आसवांची दाद आहे

मी जुना झालो कधी? का? ते मला कळलेच नाही...
वेगळे संदर्भ आता खुंटला संवाद आहे

एक रस्त्याच्या कडेला फूल खोकत बोलले, "ह्या -
माणसांचा फार आता वाढला उच्छाद आहे!"

बंगले बांधा तुम्ही पण झोपड्यांमध्येच का रे?
...बापजाद्या दौलतीचा केवढा उन्माद आहे

देवधर्माने जगी होतेच की काही भले, पण -
कोणते नियमीत होते कोणता अपवाद आहे?