घृणा... !

बरोबरी केलीस...बरेच हे केलेस...!
तुझी किती येऊन सरासरी येईल ??

उगाच मी स्वप्नात रमे कधीपासून...
उदास आयुष्यास कळा बरी येईल !

निघून सारी लाज हसायचे लाचार...
घडी अशी निर्लज्ज, निलाजरी येईल !
 
नवे नवे सारेच...अनोळखी गावात...
जुने कुणी भेटेल...मजा खरी येईल !!

नसेल अस्तित्वात जगात जी कोठेच...
म्हणे, तुझी होण्यास अशी परी येईल !!

पल्याडचा आनंद अल्याड मी आणीन...
जरी नव्या घाटात नवी दरी येईल !

- प्रदीप कुलकर्णी