--------------------------------
आधीच मी मनाशी, केल्या तयार गोष्टी
तू भेटशील तेव्हा, बोलू हजार गोष्टी...
बोलू जरा मनाचे, बोलू कुणा-कुणाचे..
संपून शब्द जाता, आणू उधार गोष्टी !
राहू उभे जरासे, पायावरी स्वताच्या
आकाश तोलण्याच्या झाल्यात फार गोष्टी..
समजू नका मला रे, इतका निरूपयोगी
सांगू शकेन मी ही, युक्तीत चार गोष्टी
गोष्टीत शेवटाला, सारेच गोड होते
भलत्याच भाबड्या या असतात यार, गोष्टी !
ऐकून गोष्ट माझी, भिजले कितीक डोळे..
कित्येक पापण्यांना, होतात भार गोष्टी
कविता, विकार, चष्मा, काठी, दिवा, बिछाना...
उरतात सोबतीला, असल्या चुकार गोष्टी...!!
-----------------------------------
गझल
- प्रतिसाद देण्यासाठी येण्याची नोंद करा